هاتوا مليون محامي.. تعليق عمرو أديب على حادث أحمد فتوح

علق الإعلامي عمرو أديب، على حادث لاعب نادي الزمالك أحمد فتوح، خلال حلقة برنامجه الحكاية.

وقال عمرو أديب: "أرجوكم محدش يخليها حكاية فتوح،  بعيدا عن إنه مشهور ولاعب كرة وكان عنده مستقبل عظيم، لكن يا جماعة بجد الحكاية حكاية أمن الشرطة اللي مات وإتداس".

وأضاف خلال برنامج "الحكاية" المذاع على قناة "إم بي سي مصر": "اللي أنا مستغرب له إن الناس كلها بتتكلم عن أحمد فتوح، وكان شارب إيه وكان معاه إيه، طيب وأمين الشرطة اللي مات وهو بيعمل الواجب بتاعه، كل المجتمع لازم يدعم عائلة الراجل اللي استشهد".

وتابع: "أمين الشرطة استشهد وهو يؤدي عمله، له عائلة ما وأكيد الداخلية عمرها ما هتسيبه وإحنا عمرنا ما هنسيبه".
 وأكمل: "هاتوا مليون محامي واعملوا مليون قضية ولكن الموضوع لا فكاك منه والقضية واضحة ولكن الحكم عند حضرة القاضي، والمحامين هيقولوا إيه ونسبة المخدر اللي فتوح كان واخدها كله عند القاضي، لكن القضية الأهم أمين الشرطة اللي كان واقف في الشارع ويؤدي دوره وطلعت فوقه عربية".

وأضاف: "فيه واحد كاتب إن الحادث مكنش فيه قصد، اللي انت عايز تقوله قوله واقعدوا بقى طبطبوا وسبسبوا، الموضوع ملهوش علاقة بأهلي وزمالك ولا الكرة، وكم من الناس بيعملوا حوادث قتل غير مقصود".

واختتم: "يجب علينا جميعا أن نتكاتف مع أمين الشرطة ووزارة الداخلية مبتنساش أفرادها ورجالتها، أفراد الشرطة واقفين على الطريق من القاهرة لحد مرسى مطروح، والمخطئ لازم يتجازى واللي بيموت لازم نشوف هنعمله إيه"