"رحلة مشاعر وإنسانية.. علي الحجار يبدع في "بخاف من عيد ميلادي"

الإثنين، 13 يناير 2025 09:23 ص

ريهام أبو الخير

علي الحجار يطرح بخاف من عيد ميلادي

طرح الفنان علي الحجار عبر قناته الرسمية على يوتيوب، أول أغنياته في 2025، والتي تحمل اسم “بخاف من عيد ميلادي”، وهي فكرة وإنتاج محمد التابعي، كلمات: حسام ابراهيم، ألحان وتوزيع وميكس وماستر أحمد شعتوت، والفيديو كليب رسوم منار عادل، فيديو جرافيك محمد أسامة.

كلمات أغنية بخاف من عيد ميلادي لـ علي الحجار

"من يوم ما بقيت جنين ولحد 4 سنين، كان قلبي له عنين بتشوف الطيبين، عيل في التختة قاعد بتعلم أبجدية، في عنيا الدنيا لسه وردية وميه ميه، في العيد باخد عيدية، ودموعي اللي في عنيا لساهم محبوسين، وسنين بتجيب سنين وأنين بيجيب أنين، ويموت فيا الحنين وأنسى أنا كنت مين، يا سنين في الجامعة طايشة يا رفاق في المسيرة، ويا بنت في قلبي عايشة معلش الإيد قصيرة، ويا ليل مرسوم في أوضتي والنوم على الحصيرة، ويا دفعة اديته صورتي وحكالي حاجات كتيرة، يمكن منكونش عيشنا لكن بنسيب سيرة، يحكيها اللي واحشنا في حكاوي السهرانين، وسنين بتجيب سنين وأنين بيجيب أنين، ويموت فيا الحنين وأنسى أنا كنت مين، تلاتيني رزين وهادي والدنيا في عيني عادي، وبخاف من عيد ميلادي ليكون الأربعين ، والشعرة البيضة بانت وبقيت خزان طيابة، والحتة القاسية ماتت أول ما اتقالي بابا، مبقولش الناس ديابة ولا أقول الدنيا غابة، وبشوف الناس غلابة وفي ساقية مربوطين، ستين من العمر عدوا والجاي مبقاش بعيد، وبقيت دلوقتي جدو وحفيد بيجيب حفيد، ولا فيه في العيد عيدية ولا إيد ماسكة فيا، وإن جيت جسيت إيديا تلاقيهم بردانين، وسنين بتجيب سنين وأنين بيجيب أنين، ويموت فيا الحنين وأنسى أنا كنت مين".